Concello da Coruña

Concello da Coruña

Cando:

19 de maio de 2021

Turismo presenta en Fitur “A Coruña Soña en Atlántico”

O concelleiro de Turismo, Juan Ignacio Borrego, destacou as claves da campaña turística “A Coruña: Soña en Atlántico” e explicou o Plan de sustentabilidade que o Goberno de Inés Rey desenvolveu co obxectivo de que o turismo avance cara a ese destino

O concelleiro de Turismo, Juan Ignacio Borrego, presentou este mediodía en Fitur a campaña turística "A Coruña: Soña en Atlántico", para promocionar a cidade como destino turístico sustentable e de calidade.

O concelleiro sinalou que desde o turismo tamén se pode avanzar cara á sustentabilidade: "O Goberno local que dirixe a nosa alcaldesa Inés Rey entende que o desenvolvemento da Coruña como destino sustentable constitúe un proceso integrador que inclúe os responsables públicos do destino, da cidadanía, as súas empresas, os mecanismos de promoción do destino e a comunicación cos turistas".

Explicou o Plan de sustentabilidade que o Concello da Coruña desenvolveu co obxectivo de orientar as accións e políticas turísticas do destino, así como para xerar sinerxías entre as empresas locais que favorezan a posta en marcha de experiencias e produtos sustentables, que fomenten o uso respectuoso do patrimonio natural e cultural da cidade". Borrego destacou o apoio do Executivo local ao sector turístico a través de axudas directas ás axencias de viaxes, un convenio firmado con Hospeco para apoiar o sector da hospedaxe e a creación de Agasalla, un programa en liña para dinamizar bonos regalos e experiencias turísticas na cidade. Tamén presentou A Coruña Convention Bureau, o ente que impulsará o turismo MICE, "unha entidade da que non só estamos orgullosos polo seu nacemento, tamén porque nace desde o sector privado coa unión de varias empresas e asociacións e que conta co apoio do sector público para o seu impulso".

O turismo náutico tamén foi un dos piares na presentación de Fitur 2021. O edil lembrou que A Coruña "xa era un destino atractivo para os cruceiros que facían escala no noso porto, pero queremos ir máis alá para lograrmos ser a capital atlántica da que falamos". Así, Borrego explicou que o Concello "aposta polo deporte do noso litoral, con especial énfase no surf, pero tamén coa vela e as amplas posibilidade que ofrece A Coruña para este deporte, e coas traiñeiras que volverán ser protagonistas a primeira fin de semana de xullo coa V Bandeira Cidade da Coruña".

O Camiño Inglés tamén formou parte da presentación da delegación coruñesa en Fitur. "A Coruña ofrece a magnífica oportunidade de completar a peregrinación cos 75 km que a separan de Santiago de Compostela sumando outros 25 km no país de orixe para poder obter a compostelana", dixo Borrego, e lembrou a posta en marcha do primeiro albergue público de peregrinos/as na cidade, grazas ao acordo entre o Concello da Coruña coa Xunta de Galicia. Para rematar, fíxose alusión á gastronomía coruñesa "que impulsamos a través de varios eventos consolidados ao longo do ano como son as Xornadas Lacónicas, as Tapas Picadillo, Boucatise ou o Festival SAL de Sabores Atlánticos". Tamén se presentou a nova marca para actividades gastronómicas e de ocio, Territorio Atlántico, en que se pon de valor "o produto de proximidade da Reserva da Biosfera e que este mes, até o día 30, podemos desfrutar nas Xornadas Gastronómicas con motivo do centenario de Emilia Pardo Bazán, baseadas nos receitarios de dona Emilia".

A presentación retransmitiuse en streaming a través da web do Concello da Coruña, co obxectivo de que a cidadanía coruñesa puidera seguir en directo as claves desta exhibición en que se puxeron de relevo os atractivos da cidade herculina.

Categorías da noticia

Que che parece esta sección?

-101-101-101

Tes un navegador demasiado antigo!

Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible

Iniciar sesión