O Concello da Coruña avanza nos traballos de humanización do Paseo Marítimo, no seu tramo entre o Dique de Abrigo e o cemiterio de Santo Amaro. Este sábado, a alcaldesa, Inés Rey, asistiu á presentación pública do proxecto, que tivo lugar na Coiraza do Orzán. Desde o mes de decembro veñen facéndose traballos previos e renovouse xa a iluminación.

Estes traballos teñen un orzamento de 3,1 millóns de euros e están cofinanciados con fondos europeos FEDER, a través da estratexia EIDUS Coruña. O obxectivo da reforma do Paseo Marítimo neste tramo procura melloralo en termos urbanos e ambientais e "naturalizalo e humanizalo", como indicou a rexedora. "Desde o Concello apostamos por unha nova maneira de entender a mobilidade nos nosos espazos urbanos, buscando amplialos para o uso e gozo da cidadanía", apunta Inés Rey.

A intervención renovará case 1.500 metros do Paseo. Substituirase o firme, soterrando os carrís do tranvía aínda existentes na zona. Actualizarase tamén a infraestrutura do carril bici, con novas dimensións de 2,5 metros e novo pavimento, e a do carril para correr, que será bidireccional con 2 metros de ancho. As zonas de circulación de vehículos e bicicletas estarán separadas por elementos vexetais.

O novo Paseo Marítimo contará tamén con novas zonas verdes. Está previsto axardinar uns 7.000 metros cadrados con novas árbores. Ademais, esta actuación prevé a creación de espazos de ocio e lecer. "A renovación deste tramo do Paseo Marítimo é unha máis das actuacións coas que buscamos impulsar un modelo de cidade activo para A Coruña", dixo a alcaldesa.