O Concello da Coruña abre hoxe o prazo para solicitar os locais de ensaio municipais. Desde este luns, 19 de setembro, pódese optar a unha das 48 prazas semanais de ensaio para o vindeiro semestre. Que, cando menos, a metade do grupo sexa menor de 30 anos, e que o 50% da agrupación acredite vivir ou cursar estudos actualmente na cidade son os dous únicos requisitos para gozar das dúas horas e media semanais de ensaio que actualmente se ofertan por grupo. A documentación requirida deberá enviarse ao enderezo de correo electrónico xuventude@coruna.gal.

As persoas interesadas poden descargar os impresos desde locaisdensaio.blogspot.com. O prazo ordinario de inscrición rematará o 2 de outubro. Os novos horarios resultantes deste proceso comezarán a aplicarse a partir do 24 de outubro.

Os novos grupos usuarios terán a posibilidade de subir o nivel do seu proxecto musical de balde, e poderán gravar as súas composicións no estudio, depurar a súa imaxe corporativa, gañar táboas enriba dun escenario en eventos e festivais, e recibir o apoio que precisan con titorías específicas para cada proxecto.

Nos últimos meses, desde os Locais de Ensaio presentáronse traballos como a publicación do primeiro EP de Veridiscent, ou Leftlovers e o seu primeiro videoclip. Outros grupos foron tomando forma, como Obsesión (que tocaron nas festas do barrio das Flores hai unhas semanas), e formacións máis veteranas como Black Crab, Crimson And Clover, ou Guilty Rage seguiron a dar concertos durante o verán. O pasado mes de xullo realizouse no Castelo de San Antón o primeiro festival os Directos do Castelo que unía a catro grupos residentes nos Locais de Ensaio.

O Goberno de Inés Rey amosa deste xeito o seu compromiso coa cultura e coa música local. Neste sentido, este mes de setembro comezou nas salas de música ao vivo da cidade unha serie de actuación dentro do Tandem Fest, formado por bandas coruñesas.