Concello da Coruña

Concello da Coruña

Cando:

23 de setembro de 2022

O Concello organiza o primeiro Encontro de Emprendemento para impulsar o emprego e a actividade económica na cidade

O evento está destinado a todo o público interesado, ademais de persoas emprendedoras e entidades que apoien os seus proxectos

O Concello da Coruña, a través do seu Departamento de Promoción Económica e Comercio, organiza a vindeira fin de semana o primeiro Encontro de Emprendemento. O obxectivo desta xornada será impulsar e reactivar a actividade emprendedora na cidade. O evento terá lugar no mercado de San Agustín o sánado 1 de outubro, en horario de 10.00 a 19.00 horas.

Con este encontro, o Goberno de Inés Rey busca crear un grande expositor do ecosistema emprendedor local e dos proxectos en marcha na actualidade. Trátase dun espazo de encontro conxunto para promocionar e promover a cultura do emprendemento e crear un ambiente propicio para a aparición e o desenvolvemento de novos proxectos emprendedores.

No I Encontro de Emprendemento do Concello da Coruña búscase dar a coñecer os recursos existentes no ámbito municipal, tanto para a posta en marcha de novas iniciativas como ideas de negocio desenvolvidas con éxito. O evento está destinado a todo o público interesado, ademais de persoas emprendedoras e entidades que as apoien.

Durante toda a xornada, as entidades que traballan no ámbito do emprendemento terán a posibilidade de dar difusión aos recursos existentes na cidade para a posta en marcha de novos proxectos empresariais. As entidades presentes serán: AJE Coruña - Asociación de Jóvenes Empresarias y Empresarios de la provincia de A Coruña, AECO - Asociación de Empresarias de A Coruña, ATA Galicia - Asociación de trabajadores por cuenta propia de Galicia, Cámara de Comercio, Industria, Servicios y Navegación de A Coruña, Concello da Coruña (Departamento de Promoción Económica), ONGD Ecos do Sur, Fundación Mujeres, Fundación RONSEL, UDC - Universidade da Coruña (Vicerrectorado de Estudantes, Participación e Empregabilidade) e a Unión de Cooperativas Espazocoop.

Así mesmo, participan no I Encontro de Emprendemento 20 proxectos emprendedores da Coruña, de recente creación, e que foron asesorados por estas entidades. Estes proxectos desenvolven actividades que abarcan desde o comercio, novas tecnoloxías ou servizos á comunidade, entre outros. Trátase de Acrux, Arela Saúde, Bima, Bsalus, Ceus App, Coffee Labora, El vino del mes, Elcano Solar, Mala Herba Producións, Marea Psicología, Maresía Comunicación, Mutä, Ola Matrona, Qaroní, Ruteart, Tako Group, The Cobardes, Travel Live Van, 50 Eat e Pablo Sanchez Otero Guitars.

Os proxectos participantes poderán ser candidatos a un premio que se entregará ao remate da xornada, e que consiste na asistencia e participación no evento Innpulso Emprende en representación do Concello da Coruña. Este evento celébrase en Valencia o 14 de outubro. Ademais, tamén terá opción de participar na VLC Startup Market, que se desenvolverá na mesma cidade, os días 15 e 16 de outubro.

PROGRAMA

10:00 Acto de inauguración e apertura ao público

10:00 a 19:00 Visita a stands e contactos coas entidades colaboradoras e proxectos emprendedores participantes. Accións de asesoramento/consulta/mentoría: as entidades poden atender consultas durante toda a xornada do encontro, no espazo habilitado para iso.

10:30 a 12:00 Encontros Conecta 2x5. Encontros entre 25 empresas do tecido empresarial da Coruña para ampliar a súa rede de contactos (require inscrición previa). (Actividade realizada por AJE Coruña)

11:30 a 12:30 Café-networking. Pausa-café para fomentar as relacións entre as persoas que participan no encontro, en representación de entidades e de proxectos emprendedores.

12:45 a 13:45 Xornada informativa: Galicia, camiño emprendedor. Metodoloxía do programa de mentoría para persoas emprendedoras a través do Camiño de Santiago. Relator: Luís García Deber. Fundación Ronsel

14:30 a 15:30 Xantar-networking. Pausa-xantar para fomentar as relacións entre as persoas que participan no encontro, en representación de entidades e de proxectos emprendedores.

16:00 a 17:30 Encontros Conecta 2x5. Encontros entre 25 empresas do tecido empresarial da Coruña para ampliar a súa rede de contactos (require inscrición previa). (Actividade realizada por AJE Coruña)

16:45 a 18:00 Mesa Redonda - Experiencias emprendedoras. Experiencias emprendedoras desenvolvidas na cidade, con diferente recorrido empresarial e contadas en primeira persoa

18:30 a 19:00 Elección do proxecto gañador do I Encontro de emprendemento e entrega do premio (consistente na participación no evento Innpulso Emprende en representación do Concello da Coruña)

19:00 Peche do I Encontro de emprendemento

Durante o encontro, programa de radio en directo desde o propio mercado, coa participación de entidades e proxectos emprendedores participantes.

Que che parece esta sección?

-101-101-101

Tes un navegador demasiado antigo!

Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible

Iniciar sesión