Vai agora un mes que a Concellería de Deportes puxo en funcionamento a páxina web https://www.coruna.gal/deportes/gl/actividades/en-lina para axudar ao mantemento do exercicio físico durante o confinamento.

O espazo dixital conta, ata o día de hoxe, cun total de 30 vídeos creados e gravados polas/os monitoras/es das Escolas Deportivas Municipais, deseñados especificamente para practicar na casa durante o estado de alarma e adaptados ás distintas idades, distribuídos do seguinte xeito:

3 vídeos de quecemento e estiramentos, para todas as idades

10 vídeos infantil/xuvenil, para 6 a 17 anos

14 vídeos de exercicios diversos para maiores de 18 anos 3 vídeos de mantemento e tonificación para maiores de 65 anos.

MÁIS DE 100.000 VISITAS Desde a posta en marcha da web co primeiro vídeo contabilizáronse 104.254 visitas na páxina, cun total de 24.178 descargas únicas. Os datos evidencian a utilidade deste servizo público, no que son parte activa tanto monitoras e monitores das Escolas Deportivas Municipais como o persoal do propio servizo municipal e as/os técnicas/os das áreas de Informática e Innovación.

OBXECTIVOS DO PROGRAMA

1. Evitar o sedentarismo.

2. Activar o corpo e a mente para mellorar o benestar xeral. 

3. Conseguir pasar o menor tempo sentada/o.

4. Contribuír a crear unha rutina diaria de vida saudable.

5. Reducir tempos de pantalla e descansar a vista.

6. Manter e/ou mellorar a forza, coordinación, flexibilidade, resistencia, equilibrio, axilidade, percepción corporal, espacial, temporal e a relaxación.

"En liña" está dirixido a menores a partir de 6 anos, mocidade, persoas adultas, maiores e familias enteiras. O material que se precisa para realizar estes exercicios físicos é moi habitual en cada casa: botellas pequenas de auga, paquetes de arroz ou pasta, medias ou calcetíns. Este programa pode seguirse desde as redes sociais de Coruña Deporte en Facebook, Twitter e Instagram. Tamén no canal de Youtube e nas páxinas web do Concello da Coruña e na propia da Concellería de Deportes.