O tenente de alcalde da Área de Seguridade Cidadá, Julio Flores, a concelleira de Tráfico e Mobilidade, Begoña Freire, e o concelleiro de Educación, Francisco Mourelo, presentaron hoxe un dispositivo "sanitario, de seguridade e mobilidade" que se poñerá en marcha este domingo, 21 de abril, con motivo da realización do II Maratón Atlántica Coruña42. Neste participarán a Policía Local, Corpo Nacional de Polícia, Corpo de Bombeiros, Protección Civil,  Cruz Vermella e voluntarios das asociacións deportivas da cidade.

O  plan de tráfico e mobilidade abarcará oito horas dende as 07.30, unha hora antes do inicio da carreira ata as 15.00 horas. Todo o percorrido da proba, que comezará na Avenida de Montoto e terminará en María Pita estará cortado ao tráfico e coutado con valos. (Ver percorrido)

Por este motivo o Paseo Marítimo, que estará entre as glorietas de Monte Alto e Labañou e en sentido contrario só estará aberto dende Regidor Somoza cara a Juan Canalejo. Tampouco se poderá circular por San Andrés, dende Catro Camiños a Praza Ourense por Palloza, Primo de Rivera e Linares Rivas e entre a Praza de Ourense a única vía será Alférez Provisional.

Por outra banda, tanto Juan Flórez como a Ronda de Outeiro, Avenida de Finisterre e Ronda de Nelle permanecerán abertas.

Non obstante, dende a Concellería de Mobilidade aconséllase evitar na medida do posible o uso do vehículo particular entre as 08.00 e as 15.00 horas. En caso de empregalo, haberá varias alternativas de itinerario:

• Cidade Vella e Monte Alto: Acceso por Alfonso Molina, Linares Rivas, Alférez Provisional e Paseo da Dársena. Saída por Alférez Provisional e Linares Rivas, carril contrario habilitado.
• Zona centro, Ensanche: Acceso por Enrique Hervada, Castiñeiras e Federico Tapia; e por avenida de Finisterre e Juan Flórez. Saída por carril protexido dende a Praza de Ourense ata a avenida de Alfonso Molina ou avenida Primo de Rivera ata avenida do Exército.
• Zona centro, Pescadería. Acceso por Monte Alto. Para a zona comprendida entre Rúa Nova e Rúa Alta – en Praza de Pontevedra, haberá pasos permeables, é dicir lentos, xa que atravesarán a carreira, que estarán en Fonseca con Juana de Vega, en San Andrés con Rúa Nova, en Cordelería con Rúa Alta e en Barrié de la Maza con Rúa Alta. Saída pola zona que linda con Monte Alto e Cidade Vella ata Rúa Nova. Cara a Juan Flórez só haberá un paso permeable en Praza de Pontevedra con Modesta Goicouría.

Ademais, a Concellería poñerá en marcha un dispositivo especial de autobuses para minimizar o impacto da proba no transporte colectivo, ao verse afectadas todas as liñas que discorren entre Monte Alto e Adormideras. Estas serán: 1, 1A, 2, 2A, 3, 3A, 4, 5, 6, 6A, 7, 11, 17 e 23A. Entre os cambios máis significativos destacar que:

• Todas as liñas que circulan pola Praza de Pontevedra cara a Monte Alto, desviaranse por Juan Flórez cara a San Pedro de Mezonzo.
• Na zona de Catro Camiños habilitarase unha parada provisional para o transbordo de liñas e a articulación de buses lanzadeiras cada dez minutos cara a Adormideras e Monte Alto.
• Estes buses serán identificados co rótulo “Servizo Especial Coruña42 Monte Alto-Catro Camiños”.
• Habilitarase na zona de Entrejardines un espazo para albergar unha plataforma guindastre que permita atender unha incidencia de autobuses en Alférez Provisional.
• En Catro Camiños facilitarase a entrada e saída de autobuses dende e cara á zona de aparcadoiro provisional.
• Informarase á cidadanía nos paneis municipais e da Dirección Xeral de Tráfico destas incidencias, así como na web municipal e da Compañía de Tranvías.

No referente a paradas de taxis haberá tres variacións a partir das 0.00 do día 21:

• A parada do Cantón Grande trasladarase a Santa Catalina, a de Modesta Goicouría á Avenida de Rubine e a de Paseo de Ronda á Avenida da Habana próxima á explanada do Palacio dos Deportes.

Non se prevén modificacións de itinerario para o resto das liñas de transporte urbano.