Ás oito da mañá abriuse o ceo, e o que as previsións meteorolóxicas anunciaban coma un orballo converteuse nunha fenomenal tromba de auga que perdurou ata a primeira media hora de carreira. Ante este panorama era moi posible que se producise o desánimo, e que moitos corredores e corredoras decidisen quedar na casa esperando unha mellor ocasión. Pero non foi así. A atleta con discapacidade visual, Carmen Gómez, cruzou a meta tras máis de dúas horas e completou a máxica cifra de 1188 atletas cubrindo a distancia do 21 Km e 97 metros, nova marca nas cinco edicións da Coruña21.

Unha hora antes dilucidáronse os gañadores da proba. O marroquí Mohamed Boucetta gañoulle a partida ao seu compatriota Hassane Ahouchar, establecendo unha nova marca da proba con 1:05:35. Terceiro entrou o atleta galego Pedro Nimo, que segue afinando a súa forma de cara ao Maratón Coruña42, que se disputarán na nosa cidade o próximo 21 de abril, e albergará o Campionato de España da especialidade.

En mulleres Fátima Ayachi non deu opción aos seus rivais, batendo tamén o mellor rexistro da proba para deixalo en 1:13:56. Secundárona no podium as galegas María Jesús Gestido e Yolanda Gutiérrez.

Apurado o aperitivo afrontamos a recta final para o prato forte, Coruña42 Maratón Atlántica.