Este domingo 25 de febreiro poderán tomar a saída da C21 e da 5K que percorrerán as rúas da cidade un total de 3.008 corredores e corredoras. O prazo de inscrición rematou a pasada noite do martes e, como xa ocorrera no 2023, a proba promovida polo Goberno de Inés Rey mellorou as súas cifras de participación con respecto á anterior edición.

Na C21 apuntáronse 1.692 persoas, 181 máis que a pasada edición, o que confirma o éxito dunha proba de máxima esixencia e que aspira a consolidarse como un dos mellores medio maratóns do país. Este ano, ademais, a proba contará coa participación de Tariku Novales, campión e récord de España de maratón.

Por outra banda, o Goberno de Inés Rey volve apostar nesta edición polo desenvolvemento en paralelo dunha proba de 5 quilómetros que lles permitirá ás persoas participantes gozar do ambiente do medio maratón e aclimatarse á distancia habitual do circuíto de carreiras populares Coruña Corre, que comeza o próximo mes de marzo. Ao peche das inscricións, hai 1.316 corredores e corredoras apuntadas.

Percorrido e características

O Concello da Coruña e a Federación Galega de Atletismo organizan esta décimo sexta edición da C21, que conta cunha distancia homologada de 21.097,50 metros. A proba está incluída no calendario oficial das competicións da FGA e da Real Federación Española de Atletismo e disputarase nun circuíto totalmente urbano e cunhas características propicias para que as persoas participantes poidan bater as súas marcas.

O medio maratón manterá o percorrido das dúas últimas edicións. As persoas participantes comezarán e concluirán a C21 no Obelisco. A primeira parte transcorrerá por Ramón y Cajal, Salvador de Madariaga e o porto coruñés. Na segunda, os/as atletas percorrerán as praias de Riazor, Orzán e Matadoiro polo paseo marítimo e atravesarán a rúa San Andrés para ir ata Porta Real e, desde alí, chegar á meta.

Incidencias no tráfico

A disputa do medio maratón C21 causará diferentes alteracións do tráfico nas vías incluídas no seu percorrido. Calquera dúbida ou aclaración pode consultarse nos números de teléfono 010 ou 092. Estas serán as incidencias previstas:

• Das 05.30 ás 12.30 horas. Corte total dos Cantóns.
• Das 05.30 ás 15.30 horas. Corte total dos Cantóns entre Santa Catalina e Alcalde Manuel Casás. Desvíase o tráfico saínte por Ambrosio Feijoo e o entrante cara á avenida dos xardíns de Méndez Núñez.
• Das 09.00 ás 12.30 horas. Corte de Juana de Vega, en sentido de circulación da praza de Mina a San Andrés. Mantense aberto en dirección de saída da cidade.
• Das 09.00 ás 11.45 horas. Corte total do tramo avenida da Mariña, estrada do Porto e avenida do Exército entre Ramón y Cajal e a rotonda da rolda de Outeiro.
• Das 09.00 ás 12.15 horas. Corte parcial, só a estrada do lado do Porto de Sánchez Bregua, Linares Rivas e Primo de Rivera. Estes cortes obrigan a montar os desvíos habituais na AC-11 Alfonso Molina e AC-12 avenida da Pasaxe. Implantaranse desde as 07.30 horas.
• Das 09.00 ás 12.00 horas. Alfonso Molina conecta directamente coa avda do Porto. Habilítase un carril de saída pola vía de entrada, na zona do viaduto.
• Das 09.00 ás 12.00 horas. Desvíase o tráfico da AC-12 avenida da Pasaxe só na dirección de entrada da cidade cara ao cruzamento de Casabranca.
• Das 09.00 ás 11.30 horas. Corte total das vías interiores do Porto.
• Das 09.00 ás 11.00 horas. Corte total da rúa Posse na dirección de saída, Alcalde Pérez Ardá, Alcalde Marchesi no tramo comprendido entre Ramón y Cajal e rúa Posse e Salvador de Madariaga (ata o cruzamento coa rolda Camilo José Cela).
• Das 09.00 ás 10.30 horas. Corte parcial de Ramón y Cajal en dirección cara a Pérez Ardá.

Estes cortes obrigan a montar os seguintes desvíos:

• Túnel de Salgado Torres. O tráfico que entra na cidade desvíase pola rotonda con Xeneral Rubín. Permititirase a saída de Fernández-Latorre.
• Rolda de Outeiro cortada no cruzamento con Pérez Ardá, polo que o tráfico do tramo da estación de tren desvíase pola saída do Hotel Avenida cara a Alfonso Molina e na zona do parque de Oza cara á travesía Rianxo. Estará habilitada a entrada e saída de transporte público da estación de autobuses.
• Na rúa Vicente Ferrer todo o tráfico desvíase cara a Rafael Alberti. Afecta igualmente a todas as incorporacións á avenida de Salvador de Madariaga, que se abrirá  en canto pase a carreira.

Aclaracións:

• Mantense a entrada e saída da estación de autobuses. Córtase a saída a Ramón y Cajal e a conexión coa Fonte das Paxariñas.
• Elimínanse as paradas de taxi situadas no circuíto, con especial atención aos Cantóns e Ramón y Cajal.
• A reapertura de todas as zonas realizarase ao paso da carreira.