A exposición "Abrindo horizontes" móstranos os cambios fundamentais que transforman a cidade na década do 70 e 80 do século XIX. Proxectos longamente xestados visibilízanse nestes momentos: derriba das fortificacións que separan a Cidade Vella coa Pescadería, as que separan A Coruña do seu arrabalde, ampliación e modernización do porto, renovación dos camiños de terra e de ferro para a chegada do ferrocarril, aliñamento de fachadas e infraestruturas hixiénicas... Contamos cun testemuño de excepción: a reportaxe que entre 1879 e 1884 realiza un ata agora practicamente descoñecido Valentín Mendía. Son 26 magníficas fotografías nas que se reflicten estes cambios. Xunto a iso 15 bandos, 4 carteis e 8 parágrafos extractados de documentos administrativos, todos eles custodiados no Arquivo Municipal, axúdannos a comprender as inquietudes, necesidades e aspiracións duns cidadáns que desexaban transformar a súa cidade.

Visitas guiadas de maneira gratuíta:

Visitas guiadas para público en xeral: os xoves ás 18.30 h e domingos ás 12.30 h.

Visitas guiadas para escolares e grupos organizados: con cita previa no teléfono 981 189 898, ou en kioscoalfonso@coruna.es.