A galería Vilaseco presenta unha dobre exposición de Antonio Murado.

• O martes 14 de novembro ás 20:30 h, dentro do programa de acción cultural 12miradas::Riverside, charla e mostra do creador.

• Xoves 16 de novembro ás 20:30 h presentación de Apartamento, exposición individual do artista dentro da programación expositiva da galería.

Licenciado en Belas Artes pola Universidade de Salamanca, desde moi pronto capta a atención do sector artístico nacional facéndose co protagonismo de distintos certames e mostras. Foi precisamente en 1995, coa obtención da Bolsa de Creación Artística no Estranxeiro Unión Fenosa · MACUF, que goza dunha estancia en Nova York, cidade na que se instalará definitivamente.

Considerado pola crítica especializada como un dos pintores españois de maior proxección internacional, o seu proxecto artístico foi obxecto de numerosas exposicións individuais en institucións de países como Alemaña, Canadá ou Estados Unidos. Igualmente, relevantes coleccións internacionais fixéronse eco da súa creación plástica, entre as que cabe mencionar Philip Morris Collection, American Express Collection, Pfizer, Brookfield - sitas en Nova York-, Nordstrom - sita en Seatttle-, ou Colección La Caixa de Arte Contemporáneo, en Barcelona e Colección CGAC, en Santiago de Compostela.