Federico Vladimir Strate Pezdirc viaxou a Terra de Fogo para crear "Cantos do Hain", un proxecto documental sobre os nómades orixinarios da devandita illa, os selknam. A mostra recreará a súa cerimonia principal, o Hain, a través da performatividade e o mito. A destrución dos ecosistemas naturais e humanos orixinada pola extracción de ouro é o punto de partida do proxecto de Ruth Montiel Arias. "Sen ouro non hai home" é o resultado da súa investigación en Perú e Sudáfrica, alí onde se atopan as minas de ouro máis importantes do mundo. Por último, Alberto Gracia convida as persoas espectadoras a deixarse levar polas imaxes presentadas. "Fascinación" está chea de obxectos atopados, instalacións e souvenirs que nos deixarán sen palabras e espertarán unha sabedoría case esquecida: o uso da superstición como medio para dar significado ao que vemos.