Desde a súa fundación en 1994 a "Orquesta Joven" da Sinfónica de Galicia permitiulles a centos de mozos/as instrumentistas completar a súa formación musical participando en espectáculos operísticos e concertos sinfónicos, baixo o maxisterio de mestres como Alberto Zedda, Víctor Pablo Pérez, James Judd, Pietro Rizzo, Michael Gilbert, James Ross ou Joan Company, entre outros.

A Orquesta Joven participou como orquestra de foso no Festival Mozart da Coruña, -no que baixo a dirección de Alberto Zedda interpretou a ópera barroca "Los amores de Apolo y Dafne", interpretación que a discográfica Naxos acaba de publicar-, compartiu escenario coa Orquestra Sinfónica de Galicia na Sinfonía nº 8 de Gustav Mahler e ofreceu concertos sinfónicos en Madrid, San Sebastián, Murcia, Valencia, León, Segovia, Xerez, Xavea e Concentaina.

Convertida xa nun dos proxectos educativos máis orixinais do panorama musical español, a Orquesta Joven supón unha das poucas posibilidades reais de achegar os/as futuros/as profesionais á práctica do seu instrumento no seo dunha orquestra sinfónica. A mocidade recibe unha completa formación musical por medio do traballo ao lado dos profesores instrumentistas da OSG, das innumerables clases maxistrais de grandes profesores e intérpretes -nas que participaron artistas coma Wolfgang Klos, Anne Gastinel, Geneviéve Laurenceau ou Mario Brunello, entre outros moitos- e do contacto diario co atril nos tres encontros anuais de que consta cada curso e nos que se abarca un repertorio que vai dende a música barroca ata a dos nosos días.