O Concello, a través da rede municipal de bibliotecas, colabora nesta edición co Festival Atlántica de Narración Oral, que se desenvolve entre os vindeiros días 15 e 19 e que este ano se estrea na Coruña con dous espectáculos gratuítos destinados a público infantil e adulto. A función dirixida a nenas e nenos, que leva o título 'Contos do Atlántico para nenos e nenas valentes', terá lugar o vindeiro xoves, día 16, ás 18.30 horas, na biblioteca da Sagrada Familia e contará coas intervencións de Cláudia Fonseca (Brasil) e Fátima Fernández (Galicia). Na sesión, as dúas artistas ofrecerán ao público miúdo un repertorio de historias en galego e castelán. Pola súa banda, o espectáculo dirixido a persoas adultas será o venres 17 de marzo, a partir das 20.00 horas, na Casa da Cultura Salvador de Madariaga, e correrá a cargo de Valter Peres (Azores), Vitor Fernandes (Tras Os Montes) e Charo Pita (Galicia), que protagonizarán 'Mar e montaña. Contos do Atlántico', tamén en galego e castelán. As dúas actuacións son de balde para as persoas que queiran asistir.

O Festival Internacional de Narración Oral naceu no ano 2013, coa vocación de ser un encontro de voces e historias de perfil atlanticista, e co obxectivo de indagar nas raíces comúns das historias do océano, na procura da identidade cultural compartida e das historias que foron difundidas polos camiños do mar. Nesta súa quinta edición recalará, ademais de na Coruña, en Santiago, Ourense, Vigo, Ferrol, Lalín e Teo. Toda a información sobre o festival está dispoñible na web http://festivalatlantica.com.