O servizo municipal de bibliotecas celebra hoxe un encontro con clubs de lectura da área metropolitana da Coruña no que participa o último premio Nadal de novela, Alejandro Palomas, e a poeta Dores Tembrás, e que servirá como colofón ao traballo feito polos clubes durante este curso. O alcalde, Xulio Ferreiro, e o concelleiro de Culturas, Deporte e Coñecemento, José Manuel Sande, interveñen tamén no acto, que se celebra no Centro Ágora. Na xuntanza participan os 82 clubs de lectura da contorna da cidade, que suman 1.066 membros, dos que 21 forman parte das actividades que ofrecen as bibliotecas municipais. Hai tamén representantes dos grupos formados en bibliotecas de Oleiros, Culleredo, Arteixo e Cambre, a que a Xunta mantén na Coruña, a da Deputación provincial, da Universidade da Coruña, o Museo de Arte Contemporánea de Fenosa, centros escolares e librerías da cidade.

O alcalde destaca o labor da rede municipal de bibliotecas, "espazos que exercen como verdadeiros centros culturais nos barrios",  e o seu arraigo na cidadanía. "Mostra disto e tamén da excelencia do seu traballo son os clubs de lectura, unha ferramenta fundamental na difusión cultural pero tamén para a socialización e a participación da cidadanía", apunta. Neste sentido, Ferreiro lembra que o "feito diferencial que supón para a cidade contar con 21 clubs de lectura nas súas bibliotecas, con algún deles especializados en temáticas como autores e autoras galegas ou o primeiro club de lectura de temática LGTBQI de Galicia e o segundo de España".