A intérprete de temas tan coñecidos como "Mi gato", "Qué bonito" ou "Como quieres que te quiera" demostrará sobre o escenario toda a forza e enerxía que caracteriza aos seus directos.

Rumba, pop, rock, flamenco, funk, soul e ata bossa nova son algúns dos estilos que a polifacética cantante e tamén actriz explorou na súa dilatada traxectoria musical. Ademais, foi coach no programa de televisión La Voz Kids, que finalizou recentemente a súa cuarta edición.

Rosario Flores recibiu varios Grammy Latino polos seus álbums "Muchas flores", disco co que se consolida internacionalmente, e "De mil colores". En novembro de 2016 lanzou o seu último álbum de estudio "Gloria a ti", cun claro retorno ás influencias do flamenco e unha sentida homenaxe á súa familia, e en 2017 saíu á venda o seu disco en directo "Noche de Gloria en el Teatro Real", onde repasa os seus mellores éxitos.

O concerto de Rosario Flores enmárcase nun interesante programa de actividades que Marineda City organizou entre o 2 e o 5 de xullo baixo o título #Mdemujer. Estas accións son parte da programación de verán do centro comercial que, entre outras cousas, contará cunha parada de foodtrucks do 5 ao 7 de xullo na praza exterior.