Os científicos e técnicos do IEO explicarán de forma próxima algúns dos aspectos da ciencia dos océanos. Para iso deseñaron varias actividades:

• Lixo no mar: Este ano como novidade procuramos concienciar sobre este grave problema. A nosa proposta é un concurso de reciclaxe de lixo mariño, cuxos resultados se poderán ver na Xornada de Portas Abertas no Centro Oceanográfico.

• O peixe e a rede: a través dun módulo interactivo mostramos a selectividade das artes de pesca, e a problemática dos peixes inmaturos e os descartes.

• A vida ao microscopio: mediante microscopios poderanse observar aqueles diminutos organismos que habitan o mar.

• O Corazón do Planeta: por medio de experiencias de física e química mariña ensinarase a distribución da temperatura oceánica, a salinidade e o pH da auga de mar.

• Coleccións mariñas: contaremos cunha colección de exemplares recollidos por compañeiros do noso Centro Oceanográfico e o de Xixón, con explicacións sobre algunhas curiosidades destes organismos.

• A viaxe dos peixes: explicaremos a importancia dos estudos de marcado e a recaptura de peixes.

• Exposición de aparellos oceanográficos de mostraxe: exhibición de equipos oceanográficos de mostraxe, dando oportunas explicacións do seu funcionamento e manexo ás persoas visitantes interesadas.

• Espazo infantil: cuxa proposta estrela é o Concurso de Debuxo María Hermida.

• Paneis diversos: con temática mariña.

• Posa co "photocall" do IEO: as persoas participantes tiveron oportunidade de facer unha foto xunto a un peixe espada de tamaño real e outros animais mariños.