4 de marzo de 2024
Os orzamentos do Concello para este ano inclúen unha partida específica de 150.000 euros coa que o Goberno de Inés Rey prevé acometer melloras de accesibilidade ao Castro de Elviña e na súa contorna
As escavacións executadas a comezos de ano, dirixidas polo investigador Samuel Nión, inciden na posibilidade dunha fase de asedio ao Castro, que deberán corroborar as probas científicas e datacións de carbono 14
Avanzan as análises dos materiais achados nas últimas sondaxes arqueolóxicas executadas na ladeira sur do Castro de Elviña, onde a finais de xaneiro se levou a cabo unha campaña financiada polo Centro de Investigación das Paisaxes Atlánticas Culturais baixo a dirección do investigador Samuel Nión Álvarez.
Ao abeiro do proxecto 'As dúas vidas dos poboados fortificados', entre os días 22 e 29 de xaneiro acometéronse escavacións na coñecida como a Terraza Sur, un promontorio situado a menos de cen metros do castro, fóra do espazo amurallado. Neste enclave, e atendendo ás anomalías identificadas por medios xeofísicos no ano 2022, analizouse a súa relación cunha posible fase de asedio ao castro. "E a día de hoxe, contamos con algúns indicios que sinalan esta posibilidade", apunta Nión.
En termos prácticos, os traballos de investigación impulsados a finais de xaneiro exploraron a teoría de que a Terraza Sur, unha superficie de planta cuadrangular de aparencia defensiva, formase parte dunha estrutura campamental de asedio. Nas sondaxes realizadas a comezos de ano identificouse unha gabia lonxitudinal de máis dun metro de anchura ao leste da Terraza Sur, onde se atoparon fragmentos de cerámica romana e unha esfera de granito de 5,6 quilogramos, tallada e picada, semellante aos proxectís da época romana, que polas súas características podería encaixar co sistema de pesos e medidas da Roma republicana.
A este respecto, Samuel Nión Álvarez incide en que "os indicios aínda son probas circunstanciais" e apunta á importancia das probas científicas en si, "datacións de carbono 14 e máis elementos materiais que, unidos ás pistas xa existentes, permitan corroborar ou desbotar a hipótese que barallamos".
O traballo de Nión, investigador posdoutoral Juan de la Cierva no Instituto de Ciencias do Patrimonio do CSIC, así como o do seu equipo, é apoiado polo Goberno de Inés Rey, que ten o obxectivo de poñer en valor o Castro de Elviña e a súa contorna, potenciándoo como un espazo cultural e histórico de primeira orde.
Neste sentido, cómpre lembrar que o Concello consignou fondos nos orzamentos deste ano para acometer un plan de melloras de accesibilidade ao castro, cun investimento previsto de 150.000 euros.
Lo sentimos pero tu navegador es muy antiguo para poder mostrar esta página. Debes de actualizarlo o usar un navegador compatible. Hemos optimizado esta web para Google Chrome, Mozilla Firefox, Opera, Safari y Microsoft Edge. Instalar ahora un navegador compatible