Públicos dos seis continentes contemplaron e gozaron da esencia dunha linguaxe única, creada por este granollerense formado como aparellador que nun momento determinado decidiu cambiar os espazos tanxibles para deseñar a beleza efémera a través das pompas de xabón.
Co paso do tempo Pep Bou fixo evolucionar a súa linguaxe creando –a través da experimentación e a investigación- novas maneiras de entender o espazo. Pero é con Bufaplanetes e agora con Rebufaplanetes cos que o artista catalán alcanza o seu máximo esplendor combinando a precisión técnica e a excelencia teatral.  Rebufaplanetes é unha revisión e actualización de Bufaplanetes, un espectáculo que é xa un referente ineludible do teatro visual europeo. Unha peza que contén todos os ingredientes dunha obra en maiúsculas: un bo argumento, espectacularidade visual e orixinalidade.