Este mércores saíron á venda as entradas para o concerto que a cantautora catalana Sílvia Pérez Cruz interpretará no Teatro Colón o vindeiro 24 de maio (21.00 horas), no que a compositora presentará o seu último traballo 'Toda la vida, un día'.

Pérez Cruz, gañadora do Premio Nacional de Músicas Actuais no ano 2022, é unha das voces emerxentes na escena musical ibérica e latinoamericana. De carácter versátil, toca de preto o xénero clásico e o jazz, achegándose tamén ao flamenco.

'Toda la vida, un día' remóntase a marzo do ano 2020, cando comezou a darlle forma cun traballo dun ano a cabalo entre cidades como Barcelona, Madrid, Bos Aires e A Habana, entre outras. Trátase dunha obra en cinco movementos que convida a reflexionar sobre as diversas etapas da existencia, recreando así a vida enteira a través da infancia, mocidade, madurez, vellez e renacemento.

As entradas para o concerto do 24 de maio no Teatro Colón xa se poden adquirir a través da páxina web de Ataquilla, así como no despacho de billetes do IMCE na praza de Ourense.

Este concerto forma parte da ampla programación musical organizada para este ano polo Goberno de Inés Rey co obxectivo de potenciar á cultura musical na cidade e de promover á Coruña como destino de ocio e cultura.