A construción dun modelo de cidade coidadora pasa para a Concellería de Xustiza Social e Coidados por un reforzo de diversos programas como o de traballo con familias, a través do que se xestionan accións de apoio social ou axudas económicas no ámbito escolar. Para iso, o departamento municipal ampliou nun 83% o orzamento para esta iniciativa en dous anos, que pasou de ter consignados 815.432 euros en 2016 a 1.493.734 no pasado exercicio. Isto supuxo un incremento no número de persoas beneficiarias e nos fondos de iniciativas como as bolsas de comedor, as prestacións para as escolas infantís ou a posta en marcha do programa de alimentación de menores en períodos non lectivos. "A Coruña está a instalar un modelo urbano no que contan os coidados e conta a defensa dunha educación pública á que todo o alumnado pode acceder en igualdade de condicións, para a procura dunha cidade que non deixe a ninguén atrás", afirma a concelleira Silvia Cameán. O programa de traballo con familias realizou o pasado ano 5.670 intervencións fronte ás 3.330 que se efectuaron no 2015.

"Un sistema público de educación non esconde que seguen a existir desigualdades e familias vulnerables ás que a administración pública ten a obriga de apoiar. O goberno local está a poñer en marcha programas e iniciativas complementarias no ámbito educativo que garantan as mesmas oportunidades a todo o alumnado e que axuden ás familias a proporcionar as ferramentas precisas para o correcto aproveitamento dos anos de escolaridade", indica a edil. Así, as bolsas comedor, que se inclúen no programa de traballo con familias, pasaron de ter un investimento de 707.840 euros no ano 2016, cando houbo 955 nenos e nenas que obtiveron a bolsa, a 1.141.875 no pasado, que supuxo un incremento ata os 1.592 alumnos e alumnas con acceso a esta axuda. Un orzamento que volve a crecer no presente curso ata os 1,5 millóns para poder beneficiar a 1.620 escolares da cidade, independentemente do centro onde se cursen os estudos. "O compromiso no investimento leva tamén unha modificación dos criterios de acceso para crear igualdade de oportunidades como a introdución do criterio económico como o principal para a adxudicación das bolsas, así como outros relativos á saúde dos e das rapazas, simplificar o proceso", resume a concelleira.

Nos dous últimos anos a Concellería de Xustiza Social tamén aumentou notablemente as axudas para o pago das escolas infantís, un investimento que pasou de obter 13.939 euros en 2016 a 46.328 no pasado ano. "Unha política na que se reduciron nun 9% as tarifas para todas as familias pero especialmente para as máis vulnerables, seguindo a liña de poñer ás persoas no centro. No caso das rendas máis baixas, os prezos baixaron ata un 90% e, por primeira vez, máis de 100 familias non pagan taxas", apunta. Tal e como lembra Cameán, no 2017 tamén se puxo en marcha o programa de alimentación de menores en períodos non lectivos, unha medida que se iniciou con 11.088 euros de financiamento e creceu ata os 75.302 no 2018 para dar cobertura ás necesidades de alimentación de 443 nenas e nenos da cidade que habitualmente acoden aos comedores dos centros educativos. "A atención á infancia precisa dun modelo integral, de acompañamento en diversos ámbitos e que redunde nun benestar comunitario. É o noso modelos de cidade coidadora próxima que garante as necesidades das persoas en situación de vulnerabilidade", conclúe.