A Concellería de Emprego e Economía Social vén de asinar un convenio de colaboración coa Consellería de Economía, Emprego e Industria que suporá a entrada da Coruña na Rede Eusumo, unha iniciativa dirixida ao fomento do cooperativismo e da creación de empresas e emprego baseados na economía social e no desenvolmentento local, liñas principais de actuación do Concello. Tal e como expón o responsable municipal nesta materia, o edil Alberto Lema, o acordo fixa a colaboración entre Concello e Xunta de Galicia a través da súa participación directa en accións de asesoramento, información e formación que se deseñen e o apoio nas coordinación das distintas actividades que se poidan desenvover nesta materia. "O Concello asume o papel de axente dinamizador do sector e beneficiarase da colaboración en rede doutros concellos e entidades, e benefíciase dos recursos que a Xunta elabore para o fomento deste modelo empresarial", destaca o concelleiro, quen lembra compromiso do Goberno local co impulso ao asociacionismo e o cooperativismo.

De acordo co documento asinado, o Concello colaborará coa a Rede Eusumo a través dun punto de información e dispoñerá un servizo de difusión da economía social no centro municipal de empresas do Papagaio, mentres que a consellería colaborará co ente local coa dotación de medios e recursos dispoñibles para a realización das actividades que se programen, e facilitará de forma puntual toda a información necesaria, desde recursos didácticos a elementos e accións promocionais ou documentos de apoio.