Cando se decide ter un bebé ou traballar coa primeira infancia debería embarcarse nunha importante viaxe, a de recoller a memoria das devanceiras, o que nos cantaban e nos contaban, aquela primeira literatura que foi pasando de xeración en xeración. Lembrar, preguntar e investigar para construír coa tradición oral un particular Libro da Memoria (da biblioteca, do barrio ou da familia), é un paso sempre necesario para facer lectores e lectoras.

Manuela Rodríguez (mestra, especialista en literatura infantil,  responsable editorial e fundadora de Kalandraka Editora) xunto con Ana Abelenda (educadora infantil, especialista en literatura para as primeiras idades e membro do equipo de animación á lectura da editorial Kalandraka) serán as encargadas de achegarnos os contos e cantos tradicionais, e as súas fórmulas de traballo para sacarlles o máximo partido cos máis pequenos.