12 de xuño de 2019
Se tes entre 12 e 30 anos pódeste apuntar
A inscrición para actividades xuvenís do programa de lecer saudable realizarase entre o 25 e o 27 de xuño
PROGRAMA DE PROMOCIÓN DO LECER SAUDABLE PARA MOZAS E MOZOS EN CENTROS CÍVICOS MUNICIPAIS 2019
A Concellaría de Xustiza Social e Coidados leva a cabo o Programa de promoción do lecer saudable para mozos nos centros cívicos e a súa contorna, no que oferta actividades dirixidas a mozas de 12 a 30 anos, que se desenvolverán principalmente nos meses de xullo e agosto.
Este programa, cofinanciado pola Delegación do Goberno para o Plan Nacional sobre Drogas, ten como obxectivos principais promover hábitos saudables, reforzar o lecer saudable e prever condutas inadecuadas entre as mozas e os mozos mediante a promoción de actividades alternativas relacionadas co lecer construtivo.
As accións que se van realizar son de tipo deportivo, ambiental, artístico, audiovisual, formativo..., de distinta duración. Entre as actividades en que poderán participar as e os mozos desde 12/13/14 anos (dependendo da actividade) ata 17 anos, están Surf Experience, cociña básica de supervivencia, zumba, volei praia, baile moderno, cociñas do mundo, xornada de iniciación á astronomía, iniciación á robótica, recuncho de estudo da ESO, iniciación a youtuber, creación de curtametraxes con móbiles, xornada multiaventura, iniciación ao debuxo manga...
Os mozos e mozas de 18 a 30 anos poderán participar en creación de páxinas web, cociña do mundo, cociña da avoa, zumba, fotografía analóxica, xornada de iniciación á astronomía...
A inscrición para estas actividades realizarase do 25 a 27 de xuño, das 11:00 ás 13:00 h e das 17:30 ás 19:30 h, nos centros cívicos nos que se desenvolve cada unha das accións.
As actividades son gratuítas e as prazas limitadas. A admisión nas actividades será por orde de inscrición.
A realización de actividades estará condicionada á existencia dun número mínimo de persoas inscritas, que pode variar segundo as características de cada unha das accións.
Para máis información, pódense dirixir aos centros cívicos municipais.
24 de abril de 2024
24 de abril de 2024
23 de abril de 2024
Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible