Tras as festas Do Nadal, chega o momento de deixar a un lado as reunións sociais e os excesos, para centrarnos de novo na nosa saúde e na nosa preparación (xa sexa para un obxectivo concreto ou para manternos en forma). Chega o momento de volver adestrar.

Moitos de vós retomaredes o contacto co exercicio físico e o deporte, despois de longos períodos de inactividade. Despois de xa algúns anos sendo o adestrador persoal de moita xente, deime conta de que case todos cometedes o mesmo erro. Volver adestrar aos niveis nos que estabades antes do voso parón.

O único que conseguiredes con isto son unhas maniotas horrorosas.

Que son as maniotas?

Ata hai non demasiado, críase que as maniotas eran cristalizacións de ácido láctico que picaban o músculo. Os últimos estudos apuntan a que as maniotas son dor muscular de orixe retardada, é dicir, o máis parecido a unha inflamación, producida polas microlesións musculares que aparecen como resposta á falta de adaptación do músculo á intensidade do exercicio, o que provoca que se acumulen gran cantidade de metabolitos ou refugallos, que dan paso a unha reacción inflamatoria e irritan as fibras nerviosas producindo dor.

Como combatelas?

Sun Tzu en El arte de la guerra dicíanos que debemos aprender a escoller as batallas que loitar, e contra as maniotas é unha batalla perdida. O mellor remedio para as maniotas é previlas, pero en caso de non poder facelo:

• Estira ben a zona
• Toma antinflamatorios non esteroideos (AINES)
• Fai contrastes frío-calor
• Exercita suavemente a zona para favorecer o rego e mellorar a súa recuperación

Como previr as maniotas?

A clave está na progresión da carga do adestramento, ou o que é o mesmo, empezar aos poucos. Este é o mellor consello que vos poden dar para previr as maniotas.

Sé paciente á hora de empezar a adestrar, establece obxectivos realistas, mantén unha dieta equilibrada e comprométete contigo mesmo.

Podes acceder á web www.entrenamientoysaludcoruna.blogspot.com