O próximo 22 de febreiro é a data na que se dará a saída ao noso Medio Maratón Coruña21. As primeiras zancadas partirán ás 10.00 horas dende o novo Parrote, onde unha hora máis tarde comezarán a chegar os corredores de novo para cruzar a liña de meta.

Precisamente, o trazado é unha das principais novidades desta sétima edición, que trata de sortear as limitacións das obras do túnel da Marina, conservando na medida do posible un deseño chairo e rápido. Coma todas nosas grandes carreiras o circuíto estará homologado pola RFEA (Real Federación Española de Atletismo), outorgando así oficialidade ás marcas.

A saída está situada na entrada do novo Paseo do Parrote e transcorre polos Cantóns o primeiro quilómetro, continuando por Linares Rivas. Xira á dereita por Ramón y Cajal para chegar á rotonda de Lonzas e volver. No quilómetro sete introdúcese na zona portuaria de San Diego e regresa pola praza da Palloza e Primo de Rivera chegando á praza de Mina, completando así o ecuador da proba. Posteriormente, colle dirección paseo marítimo bordeando o Instituto Eusebio da Guarda na praza de Pontevedra. Incorpórase ao Paseo Marítimo en dirección Millennium, onde xira 180º para volver polo propio Paseo Marítimo en dirección Torre de Hércules, deixando á marxe dereita edificios como a Domus e á esquerda a Casa dos Peixes. No quilómetro dezaoito transita aos pés da Torre de Hércules. A partir de aquí, e nun final moi rápido xa utilizado en Coruña10, o trazado segue pola zona de Adormideras, chegando ata o Castelo de San Antón e finaliza no Parrote, nunha zona moi próxima á saída.

Este circuíto é a primeira sorpresa desta edición de Coruña21 pero haberá moitas máis, que iremos desvelando nos próximos días. A información para a inscrición tédela neste enlace.

Este ano #lamitadmolamás e faise nunha única volta!