A mostra confórmana unha serie de obras que reflicten unha imaxe urbana e urbanizada do individuo, encadrado sempre en escenarios anónimos cun halo de misterio. Rostros ocultos emerxen de nebulosas de carbón e pastel, entre xestuais trazos con referencias ao street art, o tagging grafiteiro e a indumentaria urbanita. Destaca a coidada composición das súas pezas, que adoitan presentar unha banda monocolor que encadra a escena e espertan a curiosidade da persoa espectadora, nun intento por pescudar o porqué, o contexto, a razón subxacente destes personaxes sen faccións. O caos da contorna contrasta co hiperrealismo dos detalles, e a mestura de técnicas artísticas outorga unha plasticidade sorprendente a estas anónimas figuras, que emerxen de densas fumaredas de po de carbón.

En palabras do propio artista: "A miña obra é unha representación subxectiva da sociedade actual e de como nosa propia evolución está a levarnos á perda de valores, identidade e á deshumanización do individuo. A iconografía urbana invádenos, o insignificante adquire relevancia e a identidade do individuo desaparece aos poucos como consecuencia da nosa evolución."

-----------------------------------------------------------------

Marc Quintana (Tarragona, 1975) vive e traballa en Barcelona aínda que mantén un vínculo moi forte con Galicia. Participou en numerosas exposicións individuais e colectivas, viaxando entre outros lugares a Francia, ao 40ème Salon de Montrouge, París; a EE.UU. coa Gallery International en Baltimore, Maryland ou a Brasil, á Bienal 3000 MAC de Sao Paulo. A súa obra forma parte de importantes coleccións públicas e privadas.