A actividade baséase no reforzo positivo e negativo, e a procura dunha aprendizaxe significativa por descubrimento.

Neste tramo de idades o alumnado adquire máis autonomía como peón e, por tanto, maior conciencia da súa contorna, á vez que empeza a utilizar a bicicleta non só como elemento de xogo senón como vehículo. Aproveitando a súa gran curiosidade é importante guialos/as na súa interacción coa rúa, co tráfico, e aprender a participar como cidadás e cidadáns activos velando pola súa seguridade e, ao mesmo tempo, propoñendo dende unha postura crítica solucións para conseguir unha cidade cunha mobilidade amable e sostible.

ACTIVIDADE:

A actividade consiste en dividir o alumnado en dous grupos. Un dos grupos terá un "boletín de denuncias simbólico", co que poderán denunciar todas aquelas accións que considere inconvenientes e sancionables, mentres que o segundo grupo dispoñerá dunha flor feita na clase, que lles repartirá aos cidadáns e cidadás premiando as condutas cívicas e que promovan a mobilidade sostible.

• Charla de sensibilización no centro educativo sobre a mobilidade segura e sostible.
• Percorrido pola contorna próxima do centro para que, vestidos/as con chalecos policiais, e divididos/as en dous grupos realicen as seguintes accións:
  • Grupo 1: denunciar "simbolicamente" as accións que consideren inconvenientes (vehículos estacionados en pasos de peóns, tirar papeis á beirarrúa...)
  • Grupo 2: premiará cunha flor as condutas percibidas como cívicas (usar o bus urbano, a bicicleta, camiñar cara ao traballo e a escola, respectar os semáforos...).
• A continuación, os dous grupos terán que encher de forma conxunta un formulario no que sinalarán o número de denuncias postas e premios repartidos, así como a súa valoración sobre o resultado.
• Finalmente, terán que entregar o formulario por rexistro nas dependencias municipais do propio Concello, indicando ademais algunha suxestión para mellorar a mobilidade sostible na nosa cidade.