O volume de lixo non fai máis que aumentar en todo o mundo. A relación entre a xeración de residuos e a renda é un claro indicador dun modelo de produción e consumo non sustentable. Cómprenos aplicar a fórmula máxica 3R = 1º Reducir, 2º Reutilizar, 3º Reciclar.

Varios paneis explican como desenvolver esta fórmula a nivel persoal e colectivo. A educación ambiental é unha ferramenta para mellorar o modelo de xestión do lixo. Proponse promover a compostaxe doméstica e comunitaria.

Un dos paneis lembra que en 10 de setembro de 1996 se derrubou o vertedoiro de Bens na Coruña, naquel momento o de maior tamaño de Galiza, só superado posteriormente polo macro-vertedoiro de SOGAMA na Areosa (Cerceda). Para ler máis sobre a catástrofe de Bens, abre o seguinte cartafol, publicado na revista Cerna no outono de 1996: Bens, a irresponsable xestión dun vertedoiro

O da Areosa é maior vertedoiro de Galiza de todos os tempos. SOGAMA reciclou o 3% dos residuos recibidos en 2015. Despois de 18 anos de "mellora  continuada", o seu contedor amarelo apenas recuperou o 10% dos residuos de envases xerados. A este ritmo de mellora, levaríalle 120 anos acadar o obxectivo do 50% fixado para 2020.

Se SOGAMA non recicla, que fai cos residuos? Xa en 2016, SOGAMA acumulaba máis de 5 millóns de toneladas de residuos sen tratar no vertedoiro da Areosa, e nos vertedoiros do chamado Complexo Medioambiental de Cerceda acumula máis de 1 millón de toneladas de escouras e outros residuos inertes, e máis de 500.000 t de cinzas tóxicas. Unha situación insostible ... Segue lendo na seguinte ligazón: SOGAMA: o modelo máis caro, os peores resultados

A catástrofe de Bens A Coruña motivou a construción do centro de tratamento de residuos en Nostián, que converteu A Coruña en pioneira na separación da materia orgánica. Moitas cidades e rexións comezan a facer agora o que nós levamos practicando dúas décadas.

Pero a separación de residuos temos que facela máis e mellor. Ningunha peza debe fallar. A recollida separada de residuos é fundamental para garantir ecosistemas sustentables e evitar ecosistemas contaminados. Na Coruña usamos o chamado "modelo mixto húmido-seco". Se os residuos van todos xuntos, o único destino posible é o vertedoiro ou a incineración. Iso implica perder recursos aproveitables. E tamén supón contaminar o solo, a atmosfera e a auga.

As malas prácticas multiplican os custos. Non separar na orixe e reciclar menos implica pagar máis impostos e multas pola contaminación. Tamén perdemos os ingresos polos materiais recuperados, a devolución do que xa pagamos polo punto verde. E os empregos! Así, para o conxunto da sociedade e para o ben común, a reciclaxe é máis barata e máis sustentable tamén desde o punto de vista económico e social.

A participación de todos e todas nós é imprescindible. Se non conseguimos separar ben a fracción orgánica e entregala limpa no contedor que corresponde, todo vai fallar, pois os residuos orgánicos manchan os outros materiais e imposibilitan a súa reciclaxe.

Manuel Soto fará unha visita guiada en martes 12 de marzo, ás 19:30 h. Manuel é catedrático e investigador sobre a depuración de augas residuais urbanas e industriais, xestión e aproveitamento de residuos orgánicos, economía circular, pegada ecolóxica e educación para a sustentabilidade.