Esta edición do AgoraSón terá como protagonista o músico multiinstrumentista Abraham Cupeiro que, xunto coa Orquestra de Cámara Atlántica, nos presentará o seu traballo "Os sons esquecidos".

O Servizo de Normalización Lingüística, o 19 de maio ás 21.00 h, volve organizar o concerto do AgoraSón primavera (co gallo do Día das Letras Galegas e para promover a lectura e o emprego de materiais audiovisuais en lingua galega), en colaboración coas Bibliotecas Municipais da Coruña.

O evento terá lugar no auditorio do Centro Sociocultural Ágora o día 19 de maio ás 21.00 horas.

"Os sons esquecidos" é coma unha viaxe no tempo. É unha busca das fontes orixinais para fundilas co contemporáneo e crear algo novo e abraiante. Mesturaranse instrumentos de épocas pasadas cunha orquestra moderna. Escoitaremos o karnyx (instrumento de guerra) evocando o son de sereas, golfiños e o mar en pezas orixinais compostas por Abraham Cupeiro. A corna evocaranos cantos populares improvisados. Músicas e instrumentos, como o tango e o cornetto, separados no tempo, acoplaranse dun xeito natural como se fosen imaxinados na mesma época. Os sons esquecidos é a busca da esencia, do primeiro, unha viaxe pola historia e os sentimentos enraizada no presente, un traballo a prol da recuperación de instrumentos e sons esquecidos que vai moi ligado á recuperación para a nosa lingua propia de máis funcións sociais e máis espazos de uso.

A asistencia será de balde, mais precisará a recollida previa de invitación nas Bibliotecas Municipais a partir do 12 de maio. 

Repartimento de invitacións

Repatiranse as invitacións, ata esgotárense, co préstamo de material en lingua galega (libros, películas, CDs de música etc.) dende o venres 12 de maio nas bibliotecas municipais no horario de apertura de cada centro.

Faranse dúas quendas de reparto: en horario de mañá e horario de tarde.

• Horario de mañá: a partir das 9.00 h, salvo na Biblioteca de Durán Loriga, que será a partir das 12.00 horas.
• Horario de tarde: a partir das 16.00 h, agás no Punto de Servizo de Mesoiro, que será a partir das 17.30 horas.

Repartiranse dúas invitacións por carné e son sen numerar.