Programa Falamos de dinamización lingüística para os CEIP da cidade 2023

O programa de dinamización lingüística "Falamos" pretende promover a interacción entre a escola e a súa contorna para facer máis rendibles os recursos e os esforzos deses dous ámbitos en prol da normalización do galego.

OBXECTIVOS:

• Promover a utilización da lingua galega nos centros de educación infantil e primaria da Coruña.
• Asegurar a galeguización de todos os niveis do sistema educativo, tanto no ámbito docente coma no das relacións interpersoais entre os distintos membros da comunidade educativa.
• Garantir que os produtos de máxima difusión e demanda poidan chegar en galego á sociedade galega.
• Darlle ao alumnado unha visión útil e moderna da lingua galega.
• Eliminar os prexuízos lingüísticos existentes na infancia sobre o galego.

Co fin de conseguirmos estes fins imos desenvolver a seguinte actividade para os CEIP municipais (ata esgotárense as prazas):

• Representación da peza teatral "Bon appétit", de Ghazafelhos dirixida ao alumnado de primaria (de 3.º curso en diante) dos CEIP da cidade o xoves 13 de abril das 12.00 ás 13.00 h, aproximadamente

A actividade realizarase no auditorio do Centro Ágora para 330 persoas dos centros que a demanden (por orde de inscrición).

As solicitudes de inscricións realizaranas os centros interesados a través de Coruña Educa na ficha de inscrición dende o día 27 de marzo ata que se esgoten as prazas.

Deberannos indicar o número de alumnado e de profesorado acompañante, cun máximo de 60 persoas por cada centro. Confirmaráselles a inscrición aos centros por orde de solicitude ata que se complete a capacidade do auditorio.

Teatro Ghazafelhos é unha compañía nada na comarca de Ferrolterra no ano 2006 que se centrou no traballo de títeres, animación e teatro actoral e que se especializou na realización de obras teatrais para público familiar.  Sorprende con cada nova produción, mesturando xéneros, falándonos de temas variados e levándonos a mundos cheos de maxia.

Dirixida por Pepablo Patinho, quen tamén forma parte do elenco xunto a Montse Piñón e Jorge Casas, nesta actividade, tres cociñeiros, Antuá de la Sardiní, Philip de Toucignom e Fransuá de la Berenxem, son tres chefs que nos van amosar os segredos da cociña galega seguindo o prestixioso libro de receitas de Álvaro Cunqueiro, A cociña galega.

Bon appétit é unha comedia onde a cociña tradicional galega é o ingrediente perfecto para escachar de risa, na que o sinxelo pode ser tremendamente difícil e o divertido pode ser moi perigoso. Explosións, labazadas, persecucións, sustos, malos entendidos... son os ingredientes para unha comedia total en clave de clown.

Máis información en https://www.coruna.gal/lingua/gl/novas e a través de inscricionslingua@coruna.es