O Concello da Coruña despregará desde esta noite un dispositivo especial de seguridade ante a previsión meteorolóxica desta fin de semana, que alerta de fenómenos costeiros con fortes ondas así como refachos de vento en terra provocados polo paso da borrasca Félix. Así, desde as 22.00 horas desta noite, limitarase o acceso aos areais da cidade, que permanecerán pechados durante toda a fin de semana. O fenómeno meteorolóxico adverso no mar tamén provocará a cancelación das actividades previstas no exterior das instalacións do Aquarium Finisterrae.

As zonas verdes da cidade --parques e xardíns--, así como áreas infantís, permanecerán pechadas tamén até o domingo a ante o adverso por fortes ventos previsto a partires das 15.00 horas da tarde do sábado, que motivou a activación da alerta laranxa. Deste xeito, ao longo da mañá do día 10, os servizos de seguridade iniciarán o precintado destes espazos. O dispositivo por refachos da borrasca tamén afectará, polo tanto, á Casa das Ciencias, situada no Parque de Santa Margarita, ao igual que á Torre de Hércules e o seu Centro de Interpretación e de Atención ás persoas Visitantes (CIAV).

O goberno local lembra á veciñanza a importancia de seguir as recomendacións dos servizos de seguridade e emerxencia municipais así como de extremar as precaucións para evitar situacións de risco innecesarias, como non achegarse a zonas próximas ao litoral para tomar fotografías ou vídeos ante hipotéticos golpes de mar.