Cada 17 de abril, as persoas mozas e os servizos de información xuvenil de toda Europa celebran o Día Europeo da Información Xuvenil (EYID). Esta xornada, que foi declarada en 1983 pola Axencia Europea de Información e Asesoramento Xuvenil (Eryica) e o Instituto Español da Xuventude (Injuve), é unha oportunidade para recoñecer o traballo dos servizos de información xuvenil.

No ano 2024, a campaña #EYID24 céntrase na democracia e a importancia de que as persoas mozas comprendan o seu rol esencial na toma de decisións colectivas.

O 17 de abril a Rede Municipal de Información Xuvenil do Concello da Coruña, composta de 3 espazos de información xuvenil no Centro Ágora, Espazo Xuvenil Naves do Metrosidero e Fórum Metropolitano, sumarase a esta iniciativa coa posta en marcha dun stand informativo no exterior do Espazo Xuvenil do Remanso.

Neste stand, que estará dispoñible en horario de 11:00 a 14:00 h. e de 17:00 a 20:00 h., poñerase a disposición da mocidade da nosa cidade, información sobre as diferentes asesorías e programas que se ofrecen desde a Rede Municipal de Información Xuvenil, así como dos espazos e recursos que o Concello da Coruña pon a disposición da xuventude.

Ademais, en relación coa temática relacionada coa celebración deste ano, invitarase ás persoas mozas a participar respondendo aos Quizz que permitirán evaluar os seus coñecementos sobre diferentes aspectos da información, e ademais poderán obter material de merchandising de diferentes espazos municipais vinculados a temáticas de interese xuvenil.