Mes a mes de maneira ininterrompida, a programación poética do Concello da Coruña continúa a reunir no Centro Ágora o mellor da poesía de Galicia e do resto do mundo e encara agora o primeiro trimestre de recitais.

Patrocinado pola Concellaría de Culturas da Coruña, POETAS DI(N)VERSOS é un proxecto creado pola tamén poeta e xestora cultural compostelano-coruñesa Yolanda Castaño, que o coordina dende 2009. Os actos, de arredor dunha hora de duración, son sempre abertos e gratuítos para todo o público interesado, e mostran canto pode comunicar a poesía contemporánea.

POETAS DI(N)VERSOS segue constituíndo a maior cita poética regular de todo o Estado español, e mereceu en 2014 o Premio da Crítica Galicia á Mellor Iniciativa Cultural.

Luns 14 de xaneiro

VALTER HUGO MÃE

MIGUEL-ANXO MURADO

Un en portugués e o outro en galego, estes dous cosmopolitas e afoutos polígrafos son dúas raras avis rebosantes de personalidade e pensamento orixinal.

Luns 25 de febreiro

VERA DUARTE

LUCÍA NOVAS

As sutís relacións entre o elemento humano e a natureza son poetizadas con mestría por esta bueuense e por unha das máis destacadas autoras de Cabo Verde.

Luns 18 de marzo

ANDREW McMILLAN

GONZALO HERMO

A construción da masculinidade gaña en capas e matices tanto a través da revelación escocesa coma do primeiro galego Premio Nacional de Poesía Joven.