A Coruña das Letras é unha actividade nova organizada por Normalización Lingüística do Concello da Coruña para esta primavera, dentro do programa de fomento da lingua galega entre a poboación en xeral.

Co fin de traballarmos a lingua, a cultura e a literatura galegas na nosa cidade, e achegándonos a distintos barrios, realizaremos unhas andainas guiadas pola Coruña máis invisible da man do coñecido músico e escritor Xurxo Souto (sobre todo pola súa etapa no mítico grupo coruñés Os Diplomáticos de Monte Alto). 

Aprenderemos máis da toponimia tradicional da cidade, da literatura que habitou nos diferentes barrios que visitaremos e tamén da importancia da lingua nos seus diferentes contextos.

O calendario será o seguinte:

- sábado 22 de abril, ás 11.30 h (inscrición dende o luns 17)

"As ordenanzas do mar, o segredo da Pescaría" 

- sábado 6 de maio, ás 11.30 h (inscrición dende o luns 1)

"O ascenso ás Pichiricas, a aventura de Eirís"

- sábado 3 de xuño, ás 11.30 h (inscrición dende o luns 29 de maio)

"Monterrancheiro: os outros camiños da Agra do Orzán"

INFORMACIÓN XERAL QUE CÓMPRE TER EN CONTA:

- As inscricións faranse exclusivamente a través do correo inscricionslingua@coruna.gal dende o luns anterior a cada unha das andainas, ata que se esgoten as prazas (55).

- A duración é de aproximadamente unha hora e media. O lugar de saída para comezar a andaina comunicarase no correo de confirmación da inscrición.

- A actividade diríxese a maiores de 16 anos.