Os Paseos pola Coruña Literaria, que organiza Normalización Lingüística do Concello da Coruña xunto coa Asociación de Escritores/as en Lingua Galega, teñen datas e protagonistas para este outono. Dores Tembrás, Tito Pérez, María Casar (arredor da figura de Luisa Villalta) e Antonio Sandoval levarannos por diferentes localizacións da cidade que ambientaron ou inspiraron as súas obras. Serán ás 12.00 h e terán unha duración aproximada de hora e media. 

O calendario será o seguinte:

• 26 de outubro, con Dores Tembrás. "A Coruña: cartografía con puntos de fuga". Este paseo propón demorarse nalgunhas insterseccións entre pasado e presente nun péndulo que cruza tamén da palabra pública á íntima. A Coruña como territorio fascinado da literatura.
• 9 de novembro, con Tito Pérez. "Un paseo polo barrio". Seguiremos o percorrido do protagonista de O latexar do barrio e comprobaremos in situ as súas diversas realidades e contrastes. Pasaremos polo lugar onde o enterro dun poeta congregou hai 111 anos a 40.000 persoas. E, como non podía ser doutro xeito, remataremos no mesmiño centro neurálxico do barrio dos barrios galegos.
• 16 de novembro, María Casar guiará "Sobre o espello do mar e do vento", un roteiro arredor da poeta Luísa Villalta e os espazos da cidade da Coruña que poetizou nos seus libros En Concreto e Papagaio. Un camiñar pola paisaxe urbana que sae dos versos e sinala o territorio como xerme da creación. A poeta re-constrúe a Cidade como lugar mítico, como espazo de vida e de historia, na que a música enche os baleiros.
• 30 de novembro, con Antonio Sandoval. "As naturezas da Torre". Percorreremos os campos que rodean a Torre de Hércules para coñecer a súa rica biodiversidade, que motivou a súa declaración como Espazo Natural de Interese Local. Tamén charlaremos acerca dalgunhas das súas lendas e, en particular, sobre un poema moi especial, así como sobre a literatura de natureza, un xénero en auxe e cada vez máis necesario. Ademais escoitaremos o vento, o mar e uns cantos paxaros!

Prazos e forma de inscrición

Os Paseos pola Coruña Literaria están destinados a persoas maiores de 16 anos e son gratuítos. É necesaria a inscrición, pois están limitados a 55 prazas.

A inscrición pódese facer en Normalización Lingüística no Centro Ágora, chamando ao 981 184 200 ext. 34322 (a partir das 9.00 h, en calquera dos casos) e no correo lingua@coruna.es, nas seguintes datas:

• Dores Tembrás. Inscrición desde o luns 14 de outubro.
• Tito Pérez. Inscrición desde o luns 28 de outubro.
• Luísa Villalta. Inscrición desde o luns 4 de novembro.
• Antonio Sandoval. Inscrición desde o luns 18 de novembro.