Non se sabe moi ben cal foi a función da cabeceira semicircular deste edificio. A cabeceira aproveita as bases da primeira vivenda indíxena, e ten as paredes inclinadas cara ao interior, co que simula un teito abovedado.

As cúpulas de pedra non son un elemento común na arquitectura dos castros, polo que se pensa que poida tratarse dunha falsa cúpula, formada por muros abovedados, pero pechada na parte superior cunha laxa disposta horizontalmente, similar aos fornos das casas tradicionais. Este feito resulta moi curioso, pois unicamente se coñece un tipo de edificio da Idade do Ferro que presente construcións en falsa cúpula: as saunas. Puido a Exedra, nalgunha das súas primeiras fases, ser unha sauna? Dunha forma ou outra, este espazo foi reutilizado posteriormente, en época galaicorromana, como forno ou almacén.