Concello da Coruña

ALLOCATE (Acelerar o Apoderamento e Liderado Tecnolóxico Local mediante a Computación Aberta e a IA) é un proxecto do Concello da Coruña financiado polo FEDER no marco da terceira convocatoria da Iniciativa Urbana Europea (IUE). O principal obxectivo desta convocatoria é o avance das cidades cara a un futuro máis verde e dixital.

O proxecto impulsará a competitividade económica da Coruña, reducirá a súa pegada ambiental e garantirá un desenvolvemento urbano inclusivo impulsado pola IA mediante o desenvolvemento de infraestruturas que permitan a experimentación e a co-creación de IA.

Allocate fará fronte aos retos urbanos inmediatos, fomentando a participación das Pemes locais, que desenvolverán solucións de IA verdes e éticas. Ademais, buscarase crear unha nova Comunidade de Computación Local (LCC) orientada ao crecemento económico a longo prazo e a sustentabilidade ambiental urbana.

Poñerase en marcha unha nova comunidade colaborativa, apoiada polo Clúster TIC (asociación de Galicia que agrupa a máis de 150 empresas, principalmente Pemes, do sector da Tecnoloxía da Información e as Comunicacións). Espérase que se unan inicialmente unhas 40 empresas, traballando con 4 departamentos do Concello da Coruña e expertos do CITIC (Centro de Investigación TIC da Universidade da Coruña). Lanzarase unha convocatoria entre a Comunidade de Computación Local (LCC) para seleccionar 10 Pemes e Start-ups que proben tres casos de uso urbano real do Concello.

Os casos de uso centraranse en aplicar a IA á mobilidade sustentable, á recollida e tratamento de residuos e á xestión municipal de atención cidadá.