Neste primeiro Encontro Coruña Dixital, co que abrimos a programación municipal de actividades, poderemos coñecer as principais tendencias e as iniciativas máis interesantes no eido da cultura dixital, da innovación social a través de prácticas dixitais, dos proxectos tecnolóxicos sociocomunitarios, dos contidos dixitais colectivos, do espírito maker e tamén achegarnos a proxectos abertos de programación e robótica educativa.

Farémolo da man de convidados de luxo como o coruñés Juan Freire (experto de referencia en innovación e cultura dixital), José Luis de Vicente (investigador e comisario de Sónar+D, a área de innovación do festival Sónar de Barcelona), a galega Beka Iglesias (artivista dixital e coordinadora de laboratorios de arte, ciencia e tecnoloxías libres) ou Fran Díaz de Autofabricantes (proxecto de autofabricación colectiva de próteses persoais en código aberto).

Tamén teceremos unha ampla panorámica do que está a suceder en Galicia da man de referentes como Fran Quiroga (novas prácticas culturais e comúns), María Yáñez (contidos dixitais comunitarios), Chus Prol (escena maker) e a xente de Escornabot, proxecto xurdido no colectivo coruñés Bricolabs, con que nos achegaremos á programación e robótica no eido educativo.

Todo isto durante a mañá (10:00 a 14:30) e con formatos áxiles de charlas e conversas, de menos de vinte minutos cada unha. Para rematar o día, xa na sesión de tarde (16:30 a 19:30), será o momento para que calquera poida participar en mesas horizontais onde compartir coñecemento e experiencias coas persoas convidadas. Da man de Diego Parajó (Tek-Fest), abriremos tamén o código de Coruña Dixital, posibilitando que entre todas poidamos reescribir e mellorar as posibilidades desta iniciativa que terá continuidade en 2017.

En definitiva, unha cita imprescindible para tecer redes, inspirarse, aprender e experimentar xuntas coa cultura dixital. Inscríbete xa na web de Coruña Dixital! (prazas limitadas).

Inscripción