O Centro de Planeamento Familiar (COF) de Orillamar atendeu o pasado exercicio un total de 15.300 consultas, das cales 1.679 persoas acudiron por vez primeira. A concelleira de Igualdade e Diversidade, Rocío Fraga, fixo balance da actividade do centro, que xestiona o Concello a través dun convenio establecido co Servizo Galego de Saúde, e pon en valor "o labor fundamental que realiza este servizo, que é un referente de primeiro orde para a veciñanza".

Ao longo de 2018, ano no que o COF celebrou o seu 35º aniversario, o centro atendeu 15.300 consultas, entre as que 7.763 estiveron vinculadas á área de xinecoloxía; 4.816 corresponderon ao servizo de enfermería, 587 ao de psicoloxía e 1.319 foron atendidas pola traballadora social. Entre todas as asistencias, 1.679 foron de persoas que acudiron por primeira vez ao equipamento, das cales 1.554 foron mulleres. " A pesar da lamentable xestión por parte do Sergas, que non dota ao centro dos recursos materiais e humanos que precisa, tal e como demanda tanto o propio equipo do centro coma o goberno local da Coruña, os datos de consultas, intervencións e asistencias do COF dan conta, un ano máis, de que este é un espazo necesario e imprescindible para a cidadanía no eido da saúde e da educación afectivo e sexual, en particular entre as mulleres", expuxo a edil.  

O centro celebrou o seu 35º aniversario durante o 2018, ano no que recuperou o programa educativo Tarde Xove, que pretende favorecer a vivencia dunha sexualidade positiva e responsable entre a xente moza, "franxa de idade que está a incrementar as súas visitas ao COF e que demanda información sanitaria e afectiva", apunta Fraga. Ademais, no marco desta programación especial, o COF impartiu faladoiros, así como organizou contacontos, representación teatrais e outras actividades dirixidas a públicos de todas as idades co obxectivo de visibilizar e reivindicar o seu labor.

"En total, ao longo do pasado ano, as charlas vinculadas á información e orientación, celebradas tanto no COF coma noutros equipamentos, contaron con 1.042 asistencias", apuntou a edil. No eido da programación de obradoiros de saúde afectivo-sexual para a infancia e mocidade, que o centro realiza a través do Programa Coruña Educa, participaron un total de 936 estudantes de 13 IES da Coruña. Ademais, no marco deste programa, ofrecéronse charlas de VIH-SIDA en catro centros educativos --nos que participaron 261 mozas e mozos de entre 14 e 21 anos-- e os talleres Contos para emocionar, dirixidos a nenas e nenos de 5º e 6º de EP.