A concelleira responsable da Área de Benestar Social, Igualdade e Participación, Yoya Neira, presentou este luns as diversas actividades impulsadas polo Goberno de Inés Rey para conmemorar o 8-M, Día Internacional da Muller, e que se estenderán durante todo o mes de marzo.

O lema deste ano, 'Imparables', reflicte "o convencemento de que nada nin ninguén vai facer que as mulleres retrocedamos en dereitos", dixo Neira. "Xuntas seguiremos avanzando cara á igualdade real e efectiva en todos os ámbitos e só poderemos logralo co compromiso de toda a sociedade", sinalou hoxe.

Unha mostra dese compromiso social será a apertura, en Marineda City, dun punto violeta impulsado polo centro comercial e creado co asesoramento das técnicas de Igualdade do Concello. A concelleira destacou que esta iniciativa é un "exemplo de colaboración entre unha institución pública e unha empresa privada para poñer en marcha iniciativas de impacto social ante un problema que nos afecta a todos, como é o da violencia machista". Neste sentido, os puntos violeta centrarán tamén os talleres educativos que levarán a cabo durante todo este mes en distintos centros escolares da cidade.

Entre as actividades programadas para este ano destacan os 'Roteiros en feminino'. Trátase de itinerarios guiados por tres núcleos históricos clave da cidade: os xardíns do Ensanche e a Mariña; a Cidade Vella e a Pescaría. As rutas servirán para coñecer mellor a vida e a obra de mulleres que deixaron pegada na nosa historia e no noso rueiro, e están programadas para os días 6, 7 e 8 de marzo. A inscrición pódese realizar nos centros cívicos.

O venres 8 abre na Casa Museo Casares Quiroga a exposición 'Imparables', da escritora e debuxante arxentina Diana Raznovich, que reflicte nas súas viñetas situacións cotiás nas que reflexiona con ironía sobre o papel das mulleres na nosa sociedade. A exposición estará aberta ata o 31 de marzo.

Ademais, este ano, e por primeira vez desde a súa apertura, o espazo xuvenil das naves do Metrosidero súmase ás actividades do 8-M. O xoves 7 haberá un taller para elaborar carteis e mensaxes e o domingo 10 un formato 'Pasapalabra' con definicións relacionadas coa igualdade de xénero. Ambas as actividades están programadas ás 18.00 horas.

As artes escénicas terán presenza coa obra teatral 'A nena de ninguén', o día 8 de marzo no Fórum Metropolitano, que tamén acollerá o ciclo de cinema 'Retrincos de muller'. Cómpre lembrar, a maiores, que ata o día 9 continúa nas salas dos Cantóns a segunda edición do Festival Cinema por Mulleres.

A programación municipal inclúe tamén actividades deportivas, como a xornada de portas abertas do rocódromo de Riazor que terá lugar o venres 8 de marzo e a tradicional carreira popular da Torre de Hércules, un evento incluído no circuíto Coruña Corre, que inclúe novamente unha andaina solidaria que se realizará o 23 de marzo.