Agra Directo é tamén un foco de difusión de arte emerxente e un trampolín para creadores locais que mostrarán proxectos artísticos de maneira aberta e gratuíta nas rúas, prazas e comercios do barrio contando coa participación de todos os veciños.

A sección oficial divídese en CATRO EIXOS TEMÁTICOS, un por cada unha das catro semanas do Festival: Arte urbana, Fotografía, Sostenibilidade e Artes escénicas.

CUARTA SEMANA: ARTES ESCÉNICAS

A compañía galega Teatro do Andamio dirixirá a creación e interpretación colectiva dunha peza teatral ao longo dunha semana. Do 20 ao 24 de outubro, os veciños do barrio, 16 persoas inscritas previamente, converteranse en improvisados actores de teatro. Os participantes no taller crearán situacións, concibirán personaxes e espazos e deseñarán vestiario e escenografía. A estrea da obra clausurará Agra Directo nun acto que congregará a todos os veciños e persoas que fixeron posible o festival no Centro Ágora o 26 de outubro.

Completará o programa teatral o taller de teatro Integra2, dirixido a inmigrantes e persoas en risco de exclusión e que impartirá o colectivo Accem no Centro Ágora.

O artista galego Enrique Tenreiro protagonizará a performance O consumidor consumido na que, emulando o protagonista da película "La cabina", permanecerá no interior dunha neveira, instalada xunto ao Mercado das Conchiñas, vestido de executivo consumista atrapado no propio consumo.

Por último, Martín Félix Massa realizará unha instalación de vídeo-mapping nun espazo público de tránsito que interaccionará co público asistente.

As tres actividades desenvolveranse o 25 de outubro.

Agra Directo forma parte do proxecto Urbana C da Concellería de Cultura do Concello da Coruña co financiamento dos fondos europeos FEDER.