Dous creadores chegados dende distintos ámbitos expresivos –as artes visuais no primeiro e a publicidade no segundo- e que enriquecen os seus versos con elementos escénicos, accións, son e movemento, para alcanzar novas dimensións capaces de transcender o texto escrito. O galego naceu en Cee en 1975 e o peruano fíxoo en Lima catro anos antes.

O ceense David Creus publicou “Palabras para un parque hidráulico” e iniciouse nas letras da man do mítico e xa extinto colectivo poético "Batallón literario da Costa da Morte". Hoxe é profesor de debuxo en educación secundaria e compatibiliza a súa tarefa artística coa carreira na poesía multidisciplinar, parte dela compartida co seu irmán Estevo Creus.

Peru Saizprez ten catro poemarios publicados e dúas obras de teatro estreadas e asinadas en colaboración, ademais de constituír un dos nomes máis activos e recoñecidos que están a axitar a escena do que algúns dan en chamar "perfopoesía". Un verbo sorprendente e unha inesgotable imaxinación son as marcas de identidade deste orixinal creador que pisou multitude de escenarios tanto de España como de América Latina.