Cando hai un par de anos retomei a fotografía, atopeime que os poucos produtos que me quedaban na neveira do laboratorio estaban caducados. A solución foi investigar en Internet. Alí atopeime cunha web dunha empresa que tiña de todo e máis, pero á vez esta empresa tiña unha web cun foro destinado aos fotógrafos trasnoitados coma min. Ao entrar nela decateime de que había outra, logo outra,...

Enseguida rexistreime nos tres foros e empecei a participar activamente en cantidade de conversas, discusións e debates técnicos e artísticos que se producían sen solución de continuidade. De súpeto atopeime rodeado virtualmente por unha cantidade de amigos que gozaban e apreciaban o mesmo ca min: a fotografía tradicional...

Por outra banda, en Ourense desde hai máis de vinte e cinco anos realízase un evento, o "Outono fotográfico", que reúne durante os meses de novembro e decembro máis de cen exposicións en toda a xeografía de Ourense e provincias limítrofes, mesmo de Portugal.

Dáse a circunstancia de que o Ateneo de Ourense, de cuxa directiva formo parte, colabora todos os anos co Outono. Cando no Ateneo estabamos a planificar a colaboración co Outono fotográfico do ano pasado, xurdiu a idea de facer unha convocatoria para unha exposición colectiva a fotógrafos de toda España.

Púxenme en contacto a través dos anteditos foros con todos os compañeiros e ao final conseguimos unha participación de trinta e oito fotógrafos de toda España.

A condición era que todas as fotos estivesen feitas con técnicas tradicionais ou históricas.

De aí o título "Falando en prata", o metal nobre, elemento fotosensible da fotografía tradicional.