O Laboratorio de Innovación concibese como un espazo de producción e prototipado de coñecemento, a través de diferentes grupos de traballo e investigación, que impulsen procesos de innovación cidadá  para a transformación social contribuíndo ao desenvolvemento cultural, social, e económico da nosa cidade.

Para desenvolver este proxecto o Concello activará un obradoiro aberto e público no que, persoas expertas, traballadoras do Concello e interesadas idearán solucións integrais para o proxecto definitivo do Laboratorio Cidadán da Coruña, a través de metodoloxías colaborativas. 

OBRADOIRO CO-LAB

DESEÑO ABERTO DO LABORATORIO DE INNOVACIÓN CIDADÁN DA CORUÑA

O obradoiro Co-Lab será o espazo aberto de traballo e reflexión no que 90 persoas expertas, traballadoras do Concello e interesadas no proxecto idearán solucións integrais para o Laboratorio Cidadán da Coruña, a través de metodoloxías colaborativas. O programa, que publicaremos os próximos días, artéllase arredor de dous formatos:

1. Relatorios de persoas expertas:
Nagore de los Ríos falará sobre Innovación cidadá, Pedro Jiménez sobre Coñecemento aberto, Enrique Saavedra sobre Cultura e produción dixital, Juan Freire sobre Innovación educativa e Marcos García e Antonio Lafuente compartirán as súas experiencias en deseño e xestión dun laboratorio cidadán. Todos os relatorios rematarán cunha ronda de preguntas e cun debate aberto.

2. Traballo colectivo en grupos:
Realizaranse tres sesións de traballo en grupo nas que se revisará a investigación previa e benchmarking (exploración de experiencias inspiradoras) na busca de ideas-forza para o proxecto Co-Lab, se celebrará unha sesión de xeración colectiva de ideas para a implementación de cada área temática -previo filtrado e selección para o prototipado- e se deseñará unha serie de prototipos experimentais, así como a folla de ruta para a súa posta en marcha e o estudo das necesidades de recursos e infraestruturas que implicarían. Todas as sesións rematan coa posta en común dos resultados de cada grupo.

Se queres participar, inscríbete aquí. As prazas son limitadas!