Preguntas dá título ao libro que Eduardo Chillida leu durante o nomeamento de Membro Honorario da Real Academia de San Fernando, Madrid 1994.

En Preguntas, considerado en si mesmo un libro de artista, o escultor recolle e ordena por primeira vez os seus propios cuestionamentos e aforismos, que son a base fundamental para entender a súa obra.

A exposición adopta o título deste libro esencial e articúlase en dúas plantas. A primeira presenta unha diversa selección de esculturas e obras en papel, xunto ás páxinas do citado libro a grande escala. A segunda está dedicada á obra gráfica e libros de artista do escultor.

“Traballo para saber, valoro máis o coñecer que o coñecemento. Creo que debo aventurarme en facer o que non sei facer. Buscar, visualizar onde non vexo, anhelar recoñecer o que non podo discernir.”

“A aventura, cando busca o descoñecido, pode ás veces levarnos cara á arte.”

Estas frases de Eduardo Chillida son un exemplo das cuestións que recolle o libro, escritas da súa propia man concentran o pulso vital da obra do artista. Obra na que apenas existen respostas senón preguntas de índole metafísico e, con gran dose de poesía, cara ao espazo e á materia. “Son un especialista en preguntas” sostiña Eduardo Chillida.

ACTIVIDADES DE CONMEMORACIÓN DO ANIVERSARIO DE CHILLIDA

O 10 de xaneiro de 1924 nacía en Donosti-San Sebastian o artista Eduardo Chillida. Este sábado 10 de xaneiro cumpriría 91 anos.

No Kiosco Alfonso, dentro das actividades da exposición Eduardo Chillida: Preguntas, queremos celebrar os seus aniversarios co público e, para iso, propuxemos unha tarde de sábado con actividades para todos:

• Ás 18.00 h: taller infantil de Pan Cósmico no que realizaremos unha obra cerámica conxunta. A peza exhibirase no Kiosco Alfonso durante o seu secado e finalmente será entregada a Ignacio Chillida, fillo do artista e comisario da exposición. A escultura irá acompañada dunha carta de felicitación escrita polas nenas e nenos coruñeses. Para participar no taller é necesaria unha reserva previa no teléfono 657 417 857.
• Ás 19.30 h, para os adultos, unha visita guiada especial que finalizará coa interpretación de dúas danzas da suite BWV 996 de J.S. Bach, orixinal para laud: A Sarabanda e a Bourée a cargo do guitarrista Mateo Arnáiz.