Iniciamos este décimo segundo ciclo de cinema obreiro "Saíndo da Fábrica" coa película india O Tribunal. A realidade case sempre supera a ficción, e este filme é unha magnífica mostra da realidade da persecución que están a sufrir artistas, mestres, avogadas e intelectuais por criticar as atrocidades que está a cometer o Goberno indio contra os Dalits, Adivasis, minorías relixiosas e contra dos pobos de Cachemira, Assam e Manipur.

Continuaremos con A muller da montaña. Este filme relata a loita dunha traballadora social contra a industria contaminante en Islandia, abordando a contradición de querer protexer o noso medio ambiente e manter postos de traballo, unha realidade que estamos a ver por exemplo con ENCE en Pontevedra ou co feito mesmo de fabricar armas. 

Nese fío da ética do traballo, Un minuto de gloria achéganos a experiencia dun traballador honrado atrapado pola burocracia e unha sociedade onde priman os intereses económicos individualistas.

O capitalismo baséase no máximo beneficio sen importar os que verdadeiramente xeran a riqueza, que son as traballadoras e traballadores.

O filme portugués A Fábrica de nada é un bo reflexo desa busca de beneficio e do desmantelamento da industria en moitos lugares, como levamos moito tempo a padecer na nosa cidade.

Para rematar o ciclo  presentaremos China blue, a crúa realidade de traballadoras chinesas en condicións de semi-escravitude para fabricas de téxtil que elaboran moita da roupa que logo nós levamos posta. Un exemplo máis da presión económica que exercen as multinacionais e as consecuencias que sofren as traballadoras e traballadores en calquera lugar do planeta.

Debater e charlar sobre os problemas dos traballadores e traballadoras foi sempre a motivación deste ciclo, por iso continuaremos cos debates dos venres, para tentar buscar saídas e alternativas a un sistema que trata ás persoas como mercadorías e que cada día afoga a millóns de traballadoras e traballadores. De feito, poder compartir unha película e logo comentala, a día de hoxe case que é un acto de rebeldía, un xeito de facer fronte a unha sociedade que pretende illarnos para que perdamos unha das armas máis fortes das clases traballadoras: a solidariedade. 

Adolfo Naya