Elixen España de novo para a súa xira internacional pola boa acollida que xa tivo a banda aquí hai anos e pola posibilidade de compartir e colaborar facendo música con outras agrupacións musicais do país, como serán as colaboracións coa Banda Municipal Cidade de Oviedo ou co Conservatorio Superior de Música da Coruña. Concordia Orchestra e a Concordia Band Pertencen ao Concordia College de Minnesota en EE.UU, un College que destaca polo enfoque nas súas disciplinas artísticas.

O obxectivo do departamento de música do Concordia College é preparar aos estudantes para que desenvolvan unha vida creativa e con propósito a través de programas artísticos rigorosos e profesionais.

Todos os estudantes, xa sexan alumnos de disciplinas musicais ou non, poden acceder ás 19 agrupacións musicais activas do campus.

A Concordia Orchestra fundouse en 1967. Recoñecida como unha das mellores agrupacións musicais universitarias do país, a Concordia Orchestra gañou o American Prize 2018-19 e dous premios EMMY. Realizou numerosos concertos en EE.UU. e por todo o mundo; as xiras máis recentes inclúen Grecia (2018) e Terra Santa (2014).

A Concordia Band xurdiu en 1899. Un século despois, converteuse nunha organización con reputación internacional pola súa excelencia artística. Ademais de ser unha banda pioneira, foi a primeira organización do campus en realizar xiras a nivel local e no estranxeiro. A súa primeira xira internacional foi a Noruega en 1935. A agrupación seguiu facendo xiras e actuando a nivel nacional e internacional en numerosos e prestixiosos congresos e festivais de música.

Ambas as agrupacións consideran moi importante a súa programación moderna e inclusiva, que explora e defende a música de compositores historicamente excluídos; tamén presentan de forma destacada a compositores vivos, sen deixar de ter en conta as coñecidas obras mestras do pasado.