Jorge Perianes presenta unha grande instalación que ocupa a totalidade do Kiosco Alfonso. Unha intervención específica para este espazo, que por primeira vez recibe unha actuación tan masiva e que converte a nosa sala non nun mero colector para converterse en parte da obra de arte. Dentro da traxectoria do autor supón unha das súas máis transcendentes obras, na que aglutina e depura a súa longa experiencia anterior.

Con esta proposta, de carácter efémero, quere propoñernos, por unha banda, unha reflexión sobre as preexistencias da arquitectura orixinal e as sucesivas adicións e intervencións, evidenciando as tensións entre ambas. Neste sentido, ábrense ocos nos paneis perimetrais xogando con aquela luz que orixinalmente bañaría o interior do edificio. Por outra, a presenza das caixas de escaleiras ponse en relación coa provisionalidade das escaleiras de man. A escaleira de man,  metáfora do transcendente, é, para Jorge Perianes, un elemento plenamente simbólico, non tanto un medio para a huída senón, máis ben, un emblema do coñecemento (autocoñecemento), da ascensión, a progresión e a espiritualidade; por iso aparece tantas veces fragmentada, rota ou dislocada.

A instalación do Kiosco pode ser analizada dende unha perspectiva globalizadora, onde se cada variación ten un carácter autónomo, o conxunto das anécdotas xeran un ambiente cunha entidade que transcende a mera adición de elementos. O artista actúa de modo similar ao do músico traballando con variacións sobre un mesmo tema para compoñer a súa peza. Un dos méritos desta obra é que non redunda nunha repetición tediosa senón que, moi ao contrario, o artista mostra un despregamento de elementos que animan o percorrido.

Durante a exposición realizaranse talleres didácticos para nenos.

Realizaranse 3 talleres dirixidos a nenos de entre 4 e 6 anos, os sábados 22 e 29 de decembro e nenos de 7 e 11 anos os días 12 de xaneiro e 2 de febreiro, de 11 a 13 horas (o taller é dunha única xornada e as prazas son limitadas).

Os talleres serán impartidos por María Cebrián e equipo.

Inscrición nos teléfonos: 981 18 98 98 (mañás) e 619 46 04 27 (tardes)

Esta actividade é gratuíta.

HISTORIA DUNHA ESCALEIRA é un taller práctico de arte dirixido a nenos de entre 4 a 6 anos que parte do achegamento á intervención artística de Jorge Perianes no Kiosco Alfonso. A instalación que presenta, a partir de tramos de escaleiras de man modulares e ocos abertos nos muros, permitiranos profundar plasticamente nas nocións de espazo, dirección, perspectiva e a construción das sombras, como elementos de formalización do espazo.
A través de dinámicas de xogos espaciais e, da construción de artefactos, buscaremos como articular e sorprender os máis pequenos, transformando o espazo a partir das súas propias intervencións.