O luns 1 de decembro ás 19.00 h, na Biblioteca Fórum Metropolitano, temos a presentación/acción poética do libro "O mal do aire", a cargo de Maite Mosconi. A autora estará acompañada polo trompetista Wilson Ortega xunto á intérprete na lingua de signos Lola Corzo.

Organizado pola Asociación AÏS, coa colaboración da Deputación da Coruña.

Acceso libre até completar a capacidade.

Biografía:

Maite Mosconi (Galicia, 1985) escritora e Técnica cultural, publicou obras de fantasía celta (Gaedheal, Libro 1 de las invasiones), distopía (Helheim) e, xunto a Miriam Beizana, un libro para nenos e nenas (Guerreiras de lenda) baseada nas lendas populares de Galicia.

Agora, vén presentarnos O mal do aire, un poemario que, por medio da mitoloxía galega que sempre caracterizou a súa obra, nos relata a simboloxía do declive existencial desde unha crenza atávica.

A autora dá talleres como experta en escritura creativa, lendas e mitoloxía nos centros educativos de toda Galicia.

Sinopse:

A morte, o medo á morte, a morte na súa metamorfose.

O mal do aire é a expresión coa que se fai referencia á doenza con variedade de síntomas que causa a fin dunha vida.

Tódolos aires son temidos, pero o que máis, é o de morto.

A través destas once historias poéticas a autora relátanos a simboloxía deste declive existencial desde unha crenza atávica, mediante personaxes fantasiosas inspiradas nos mitos e lendas de onde ela é, así coma na propia experiencia, cun sentimento constante de inquedanza e perda da propia natureza.

Porque ninguén pode fuxir do mal do aire.

Sempre sobrevén cando menos o esperas.