Unha peza que mestura testemuños de vítimas, persoas expertas e música para reivindicar a loita polas ideas de xustiza de principios do século XX e os avances no agrarismo, sindicalismo, economía e educación que se deron naquel momento, así como para poñer en valor a resistencia ante o golpe do 36.

ACORDAMOS é a segunda entrega da chamada "cartografía musical" da memoria histórica da provincia, que nesta edición segue a percorrer lugares significativos. A peza gravouse en Sobredo, Moaña, Lérez, Illa de Arousa, Tomiño, Xiabre e reúne testemuños de familiares e persoas investigadoras xunto coa música de Uxía, Quilma As Divinas, Malvela, Celina da Piedade e Ana Santos, Wöyza e María Faltri, Antía Muíño e Luis Pastor, Treixadura e Sondarúa.

A idea orixinal é do Departamento de Memoria provincial, a dirección artística corre a cargo de foi Uxía, Lucas Terceiro o responsable da dirección técnica e realización, Tito Ledesma do son en directo, Conchi Carro da produción e Carmen Conde do guión.